ബെംഗളൂരു: ഓൾ ഇന്ത്യ സ്‌പൈസസ് എക്‌സ്‌പോർട്ടേഴ്‌സ് ഫോറം (AISEF) സംഘടിപ്പിക്കുന്ന അന്താരാഷ്ട്ര സുഗന്ധവ്യഞ്ജന സമ്മേളനം (ഐ. എസ്.സി - 2025) ബെംഗളൂരുവിലെ ലീല ഭാരതീയ സിറ്റിയിൽ ആരംഭിച്ചു.

സുഗന്ധവ്യഞ്ജന വ്യാപാരത്തിലെ വെല്ലുവിളികളും അവസരങ്ങളും ചർച്ച ചെയ്യുന്ന നാല് ദിവസത്തെ സമ്മേളനത്തിൽ ആഗോള വ്യവസായ പ്രമുഖരും, നയരൂപീകരണ വിദഗ്ദ്ധരും, ഗവേഷകരും  പങ്കെടുക്കുന്നുണ്ട്. 

ഭാരത് ബയോടെക് ഇന്റർനാഷണൽ ലിമിറ്റഡിന്റെ എക്‌സിക്യൂട്ടീവ് ചെയർമാൻ ഡോ. കൃഷ്ണ എം. എല്ല സമ്മേളനം ഉദ്ഘാടനം ചെയ്തു.

സുസ്ഥിരവും ഉയർന്ന ഗുണനിലവാരമുള്ളതുമായ സുഗന്ധവ്യഞ്ജന വ്യവസായം സൃഷ്ടിക്കുന്നതിനായി ഗവേഷക - വ്യവസായ- ഗുണനിയന്ത്രണ സ്ഥാപനങ്ങൾ  യോജിച്ച്  പ്രവർത്തിക്കണമെന്ന് അദ്ദേഹം പറഞ്ഞു 

സുഗന്ധവ്യഞ്ജനങ്ങളുടെ ഔഷധമൂല്യം  കൂടി വിലയിരുത്തി അവയെ മരുന്നുകളെപ്പോലെ പരിഗണിക്കാൻ അദ്ദേഹം വ്യവസായികളോട് ആവശ്യപ്പെട്ടു.

വിത്ത് വികസനം, കീടനാശിനി കുറയ്ക്കുന്നതിനുള്ള നാനോ ടെക്നോളജി, സസ്യ പ്രതിരോധശേഷി വർദ്ധിപ്പിക്കുന്നതിന് ബയോ-സ്റ്റിമുലന്റുകൾ എന്നിവയിൽ കൂടുതൽ ശ്രദ്ധ കേന്ദ്രീകരിക്കണമെന്നും ഡോ. കൃഷ്ണ എം. എല്ല പറഞ്ഞു.

ആഗോള സുഗന്ധവ്യഞ്ജന വ്യാപാരത്തിൽ ചരിത്രപരമായി  പ്രധാന പങ്കാളിയായ ഇന്ത്യ ഇന്ന് ആഗോള വിപണിയുടെ 25% വിഹിതം നിലനിർത്തുന്നുണ്ടെന്ന്  സ്‌പൈസസ് ബോർഡ് ഇന്ത്യയുടെ സെക്രട്ടറി പി. ഹേമലത ഐഎഎസ്  പറഞ്ഞു.

വൈവിധ്യമാർന്ന കാർഷിക-കാലാവസ്ഥാ മേഖലകൾ, മികച്ച അടിസ്ഥാന സൗകര്യങ്ങൾ വൈദഗ്ധ്യമുള്ള തൊഴിൽ ശക്തി, 8,400-ലധികം രജിസ്റ്റർ ചെയ്ത കയറ്റുമതിക്കാരും 830  നിർമ്മാതാക്കളും ഉൾപ്പെടുന്ന ശക്തിയാണ്   രാജ്യത്തെ  സുഗന്ധവ്യഞ്ജന കയറ്റുമതി മേഖല.  

ഇന്ത്യ നിലവിൽ 180-ലധികം രാജ്യങ്ങളിലേക്ക് 225 സുഗന്ധവ്യഞ്ജന ഉൽപ്പന്നങ്ങൾ കയറ്റുമതി ചെയ്യുന്നുണ്ട്.  മൂല്യവർദ്ധനവിലും മികവ് പുലർത്തുന്നു.

ആഗോള സുഗന്ധവ്യഞ്ജന മാനദണ്ഡങ്ങൾ ഏകീകരിക്കുന്നതിനുള്ള എല്ലാ സംഘടിത ശ്രമങ്ങൾക്കും മുൻകൈ എടുക്കാൻ ബോർഡ് പ്രതിബദ്ധമാണ്.

ആരോഗ്യ രംഗത്ത് സുഗന്ധവ്യഞ്ജനങ്ങൾക്കുള്ള ആഗോള വിപണി വർദ്ധിച്ചുവരുന്ന സാഹചര്യത്തിൽ, മഞ്ഞൾ, ഇഞ്ചി, വെളുത്തുള്ളി എന്നിവയുടെ ഔഷധ ഗുണങ്ങളിൽ ശ്രദ്ധ കേന്ദ്രീകരിച്ച് ഇന്ത്യ ന്യൂട്രാസ്യൂട്ടിക്കൽ, ഫാർമസ്യൂട്ടിക്കൽ, ഡയറ്ററി സപ്ലിമെന്റ് ഗവേഷണങ്ങളിൽ ശ്രദ്ധ കേ ന്ദ്രീകരിക്കുന്നുണ്ടെന്ന് പി. ഹേമലത  പറഞ്ഞു.

2024 ൽ 24 ബില്യൺ യുഎസ് ഡോളറായി വിലമതിക്കുന്ന ഇന്ത്യൻ സുഗന്ധവ്യഞ്ജന വിപണി 2033 ഓടെ 61 ബില്യൺ യുഎസ് ഡോളറിലെത്തുമെന്നും 10.56% വാർഷിക വാർഷിക വളർച്ച കൈവരിക്കുമെന്നും പ്രതീക്ഷിക്കുന്നതായി എ.ഐ.എസ്. ഇ എഫ്  ചെയർമാൻ  ഇമ്മാനുവൽ നമ്പുശ്ശേരിൽ പറഞ്ഞു.

ഉദ്ഘാടന സമ്മേളനത്തിൽ, സ്‌പൈസസ് ബോർഡ് ഇന്ത്യ സെക്രട്ടറി .പി.ഹേമലത ഐഎഎസ്, അഭിനവ് ബിന്ദ്ര,  കൊച്ചിൻ ചേംബർ ഓഫ് കൊമേഴ്‌സ് ആൻഡ് ഇൻഡസ്ട്രി പ്രസിഡന്റ് എസ്.പി. കാമത്ത്,ഓൾ ഇന്ത്യ സ്‌പൈസസ് എക്‌സ്‌പോർട്ടേഴ്‌സ് ഫോറം (എഐഎസ്ഇഎഫ്) ചെയർമാൻ  ഇമ്മാനുവൽ നമ്പുശ്ശേരിൽ; 
ഐഎസ്‌സി 2025 ബിസിനസ് കമ്മിറ്റി ചെയർമാനും എഐഎസ്ഇഎഫ് വൈസ് ചെയർമാനുമായ മിസ്റ്റർ നിഷേഷ് ഷാ എന്നിവർ സംസാരിച്ചു.

ആഗോള സുഗന്ധവ്യഞ്ജന വ്യവസായത്തിന്  നൽകിയ സമഗ്ര സംഭാവനകൾക്കുള്ള ലൈഫ് ടൈം അച്ചീവ്‌മെന്റ് അവാർഡ് ഉദ്ഘാടന സെഷനിൽ മാനെ ഗ്രൂപ്പ് ഓഫ് കമ്പനീസിന്റെ സി.ഇ.ഒ ജീൻ മാനെയ്ക്ക്  നൽകി ചടങ്ങിൽ  ആദരിച്ചു. 

ആഗോള സുഗന്ധവ്യഞ്ജന വ്യാപാരത്തിലെ സത്യവും മിഥ്യയും എന്ന വിഷയത്തിൽ ആദ്യ ദിവസം ചർച്ച നടന്നു. ഐ‌എസ്‌സി എക്‌സ്‌പോ 2025 ഉം ഉദ്ഘാടനം ചെയ്യപ്പെട്ടു.

നാല് ദിവസങ്ങളിലായി, മുഖ്യ പ്രഭാഷണങ്ങൾക്കും, പാനൽ ചർച്ചകൾക്കും പുറമെ
കൃഷി, സംസ്കരണം, വിപണനം എന്നിവയിലെ സാങ്കേതിക വിപ്ലവം,  വ്യവസായ പ്രമുഖരുടെ വിശദമായ വിള റിപ്പോർട്ടുകളും,  ട്രെൻ്റ് വിശകലനവും
ഉൾക്കൊള്ളുന്ന സെഷനുകളും നടക്കും. 

ആഗോള സ്‌പൈസ് വ്യാപാരത്തിൽ സഹകരണം വർദ്ധിപ്പിക്കുന്നതിനായി അമേരിക്കൻ സ്‌പൈസ് ട്രേഡ് അസോസിയേഷനും  ഓൾ ഇന്ത്യ സ്‌പൈസസ് എക്‌സ്‌പോർട്ടേഴ്‌സ് ഫോറവും ഏറെ ശ്രദ്ധേയമയ  ഒരു ധാരണാപത്രത്തിൽ ഒപ്പുവച്ച ചടങ്ങും ആദ്യ ദിവസം നടന്നു.